Ermənistan hər vəchlə Cənubi Qafqazda dayanıqlı sülhün bərqərar olunmasına maneə törədir. Rəsmi İrəvan özünü sülh qaranquşu kimi təqdim etsə də, Qarabağda baş verənlər bunun əksini göstərir. Təkcə dünən Şuşada baş verən hadisəni bunun bariz nümunəsi saymaq olar.
Məlumat üçün deyək ki, aprelin 22-si saat 17:00 radələrində Azərbaycanın Silahlı Qüvvələrinin Allahqulular kəndi ətrafındakı yüksəkliklərdə yerləşən mövqelərinə təminat vasitələrini daşıyan Azərbaycan Ordusuna məxsus hərbi yük maşını ermənilər tərəfindən qəsdən yolun hərəkət istiqamətində basdırılmış minaya düşərək partlayıb. Nəticədə avtomobilin sürücüsü və maşın başçısı yaralanıb, nəqliyyat vasitəsi sıradan çıxaraq yararsız vəziyyətə düşüb. Dərhal yaralılara yardım göstərmək üçün gələn hərbi qulluqçulardan biri də piyada əleyhinə minaya düşərək xəsarət alıb. Minaya düşən 3 hərbi qulluqçumuza təxirəsalınmaz tibbi yardım göstərilib.
Hadisə barədə Rusiya sülhməramlı kontingenti və Türkiyə-Rusiya Birgə Monitorinq Mərkəzinin komandanlıqlarına məlumat verilib.
Bu, 44 günlük Qarabağ savaşından sonra ermənilərin törətdiyi çoxsaylı təxribatlardan biridir. Bundan əvvəl də ermənilərin mina terrorunun şahidi olmuşuq. Azərbaycan tərəfi dəfələrlə rəsmi İrəvanı bu sayaq təxribatlara son qoymağa çağırsa da, nəticəsi olmayıb. Əskinə, müşahidələr göstərir ki, Ermənistan faktiki olaraq Azərbaycanla hibrid müharibəni daha dərinləşdirmək niyyətindədir. Bu ölkədən Xankəndinə silah, şəxsi heyət daşınması da İrəvanın sülhə deyil, müharibəyə hazırlıq gördüyünü göstərir.
Maraqlıdır ki, Ermənistanın bu əməlləri bölgədəki Rusiya sülhməramlılarının gözü qarşısında baş verir. Bir neçə gün əvvəl Ermənistanda Xankəndinə silah daşınması ilə bağlı videogörüntülər yayılmışdı. Həmin görüntülərdə bu addımın Rusiya sülhməramlılarının müşayiəti ilə həyata keçirildiyi aydın görünürdü. Bu fakt sülməramlıların artıq Ermənistanın bölgədəki davranışlarına nəzarət edə bilmədyini, yaxud nəzarət etmək istəmədiyini ortaya qoyur. Bu halda Azərbaycan öz ərazisində sülhü bərqərar etmək üçün müvafiq addımlar atmaq məcburiyyətində görünür. Bununla belə, sülhün əldə edilməsində maraqlı olduğunu açıq şəkildə göstərərək adekvat addımlar atmağa tələsmir. Amma bu Bakının təmkini uzun müddət surə bilməz və günün birində “dəmir yumruq” yenidən işə düşə bilər.
