Azərbaycan-Ermənistan sərhədində nəzarət-buraxılış məntəqəsinin qurulması Müzəffər Ali Baş Komandan, Prezident İlham Əliyevin apardığı düzgün daxili və xarici siyasətin daha bir uğurlu nəticəsidir. Qurulmuş keçid məntəqəsinin çox böyük və ciddi hərbi əhəmiyyəti də var. Nəzarət-buraxılış məntəqəsinin qurulması erməni hakimiyyətinin öz mənfur əməllərini davam etdirməsinin qarşısını alacaq.
Bu fikirləri AZƏRTAC-a açıqlamasında YAP İdarə Heyətinin üzvü Bayram Aslanov səslənddirib.
Onun sözlərinə görə, artıq Ermənistan hakimiyyəti və ordusu kölgəsinə sığındığı sülhməramlıların dəstəyi ilə olsa belə ərazidə hərbi texnikalarını istədikləri yerlərə daşıya, silah-sursat və diversiya qruplarını istədikləri kimi hərəkət etdirə bilməyəcək. “Sözügedən məntəqə Aprel döyüşlərində Lələtəpə yüksəkliyinin azad edilməsi ilə başlayan Zəfər tariximizin daha bir uğurlu səhifəsidir. Bu gün Azərbaycan gəncləri də bu keçid məntəqəsinin hərbi əhəmiyyətini çox gözəl başa düşürlər. Bununla yanaşı, artıq uzun müddətdir Laçın-Xankəndi yolunda könüllülərimizin qurduqları “canlı post”un tələbi də aktuallığını qoruyub saxlayır. “Terrorun vətəni, dili, dini, milliyyəti olmur” deyimi bu gün də dünyada aktualdır. Əgər könüllülərimiz öz sinəsini regionda baş verən ekoloji terrora sipər etməsəydilər, yəqin ki, bu gün tarixən öz havadarlarına söykənərək xalqımızın tarixində qara səhifələrin baiskarı olmuş Ermənistan dövləti regionda ekoloji terrorunu davam etdirərdi. Əlbəttə, könüllülərimizin aksiyasına dünyadan və xüsusilə ermənipərəst xalqlardan, mətbuat orqanlarından gələn sərt reaksiyalar onların əzmini, iradəsini qıra bilmədi və bilməzdi. Bu günlərdə ermənipərəst ölkələrin və media qurumlarının gündəminə çevrilən Laçın yolundakı nəzarət-buraxılış məntəqəsi terror aktlarının qarşısının alınmasına, düşmən ordunun qaydalara əməl etməsinə xidmət göstərir və regionda əsl sülhməramlı missiya həyata keçirəcək”.
