Xəzər Universiteti Dünya Məktəbinin 4 şagirdi Azərbaycan komandasının heyətində “First Robotics Competition” yarışmasında iştirak edib.
“Qafqazinfo” xəbər verir ki, bunlar 10-cu sinif şagirdləri Müslüm Əliyev, Yusif Şükürlü, 9-cu sinif şagirdləri İbrahim Allahverdiyev və Nicat Tağızadədir.
Onların üzvü olduqları MechHack #9030 komandası komandanın baş mentoru Təranə xanımın rəhbərliyi ilə yarışmada uğurla iştirak edib və ən yaxşı yeni komanda mükafatını və dünya çempionatı üçün “Wild Card” qazanıblar.
Bu barədə məktəbin direktoru Rəna Həsənova fikirlərini bildirib: “4 şagirdimiz uğurla Azərbaycan komandasının heyətində idi. Onlar uğurlu çıxış ediblər. Texnologiya əsrində şagirdlərimizin bu cür biliklərə sahib olması bizi sevindirir. Çünki qarşımızda duran vacib vəzifələrdən biri də budur. Şagirdlərin texnoloji biliklərinin yüksəldilməsinə xidmət etməliyik. Əminik ki, qarşıdakı yarışlarda başqa şagirlər də iştirak edəcək”.
Daha sonra yarışmada iştirak edən şagirdlər danışıblar. İbrahim Allahverdiyev yarışdakı çıxışlarından söz açıb: “Bu yarışma gənclərin biliklərini ortaya qoymaq üçün böyük yarışmadır. Dünya çempionatına “Wild Card” qazandıq. Yaratdığımız robot sadə dizaynda olsa da, əməliyyatları sürətli və effektiv yerinə yetirdi. Azərbaycandan ilk komanda olsaq da, dünya çempionlarına qalib gəldik”.
Nicat Tağızadə isə robot haqqında danışıb: “Robotumuzun çəkisi 30 kq və boyu isə 150 sm-dir. Biz robotumuzu qaydalara görə qururuq. Əsas işimiz robotu təkmilləşdirmək idi”.
Müslüm Əliyev sosial layihələrdən söz açıb: “Bizim sosial prosesləri həyata keçirəndə məqsədimiz robotexnikanı Azərbaycanda inkişaf etdirmək idi. Uşaqlara da bu yöndə dərslər vermişik və bunu pulsuz etmişik. Lakin bəzi valideynlər qarşılığında heyvan yeməkləri verirdi və biz onları heyvanlar üçün aparırdıq”.
Yusif Şükürlü çətinliklərdən danışıb: “Biz robot düzəldərkən çətinliklərlə üzləşdik. Gec başladığımıza sponsorlarımız az idi. Finans hissəsi valideynlərin üzərində düşdü. Çətinliklərə baxmayaraq, Azərbaycanı Nyu-Yorkda layiqincə təmsil etdik. Növbəti illərdə də ən yaxşısını etməyə çalışacağıq”.
