“Azərbaycan Sənaye Korporasiyası” ASC-nin Baş direktoru Kamran Nəbizadə Samux rayonunda yerləşən Bəhrə Ağır Atletika klubunda olub.
ASK-dan AZƏRTAC-a bildirilib ki, Baş direktor Korporasiyanın törəmə Cəmiyyəti olan “Azərpambıq ASK” MMC-nin təşəbbüsü və dəstəyi ilə yenidən təmir edilib istifadəyə verilmiş klubdakı şəraitlə tanış olub.
Məlumat verilib ki, hazırda burada 40-a yaxın yeniyetmə və gənc idmançı məşq edir. Onlar arasında artıq ölkə çempionatlarında birincilik qazananlar da var.
Ölkəmizdə idmana olan dövlət qayğısından və bədən tərbiyəsinin inkişafından danışan Kamran Nəbizadə qeyd edib ki, həyata keçirilən tədbirlər Azərbaycanın bu sahədə nailiyyətlər əldə etməsi ilə yanaşı, sağlam gəncliyin yetişməsində də mühüm rol oynayır.
Yeniyetmə və gənc idmançıların məşq prosesini izləyən Baş direktor onlara gələcək idman yarışlarında qələbələr arzu edib.
