İndoneziyadakı turnirdə bəlkə də daha çox xal toplaya bilərdim.Bunu “Report”a açıqlamasında İndoneziyada keçirilən beynəlxalq turnirin qalibi olmuş azərbaycanlı qrossmeyster Eltac Səfərli deyib.Şahmatçı əksər qarşılaşmaları rəqiblərindən üstün keçirdiyini bildirib:“Turnir mənim üçün yaxşı, rahat keçdi. İkinci turun oyunu çətin oldu. Yeganə məğlub olduğum görüşdə bərabər vəziyyətdə çox risk etdim. Digər bütün qarşılaşmalarda demək olar üstünlük tərəfimdə idi. Bəlkə də daha çox xal toplaya bilərdim. Yenə də 11 oyunda 8,5 xal yaxşı nəticədir”.O, turnir haqqında da təəssüratlarını bölüşüb:“Qapalı turnir idi. Reytinq cəhətdən adətən belə yarışlarda oynamaq çətindir. Çünki şahmatçıların əksəriyyəti daha az reytinqə sahib idi. Tanınmışlardan hindistanlı qrossmeyster Sethuraman Panayappan var idi. Hansı ki, uzun illər 2650-2700 əmsalla oynayırdı. Avstraliyalı qrossmeyster Teymur Kuybokarov da iştirak edirdi. Ümumilikdə 7 ölkədən 12 şahmatçı iştirak edirdi. Demək olar hər biri öz millilərinin üzvləridir”.E.Səfərli turnirin mükafat fondu və qarşıdakı planlar haqqında sualı da cavablandırıb:“Yarış A və B qruplarından ibarət idi. Ümumi mükafat fondu 40 min dollar idi. Qarşıdakı planlara gəlincə, apreldə “Reykyavik Open”də iştirak edəcəyəm”.Qeyd edək ki, Eltac Səfərli 11 turdan ibarət yarışda 8,5 xal toplayaraq bütün rəqiblərini üstələyib.
İndoneziyada çempion olan azərbaycanlı şahmatçı: “Bəlkə də daha çox xal toplaya bilərdim”
